جمعية شادي وانا

"شادي وانا" اِسمنا .. مبسوطين فيو كتير... اِسمنا اللي وُلد من لقاء صار مع أصغر ولد بأول مؤسسة زرناها .. وكان اسمه "شادي". شادي ببراءته, بعيونه, بشفافيته, وبطفولته اللي ما تجاوزت الأربع سنين قِدر يعطينا "الدفشة" عشان نكمل وما نتعب... ما نتعب من انو نرسم بسمة عَ وجوه اطفال محتاجة ونمتِّع نظرنا بفرحة عيونهن. "شادي" هو كل طفل محتاج بُشعر بالفرحة و"أنا" هو كل انسان حابب يشوف بسمة طفل ويكون السبب بفرحة عيونه,هادا كلو ممكن يصير ويتحقق بِ " شوي مني وشوي منك بِفَرحوا كتار"ومن هون بيجي اسمنا الثاني اللي بحاول يوَصِلنا انو بنقدر نجمع أغراض كتيرة اللي بتكون كفيلة انها تفرح الاطفال , بِشوية مسليات , شوية ألعاب, شوية شوكولاطات , أواعي .... كلشي,ولما بنعطي.. بنعطي شوي مني وشوي منك بتتجمع عنا كتير أغراض وساعتها بنفرح أطفال كتار. صفحتنا ... صفحة "شادي وأنا"..صفحة "شوي مني وشوي منك بفَرحوا كتار", بتقدروا تعتبروها همزة الوصل بين أهل الخير والاطفال المحتاجة, بتقدروا تعتبروها المكان اللي فيو بتعطوا كلشي حابين توصلوه للأطفال اللي موجودة بمؤسسات كثيرة ومختلفة. الأشياء والأغراض بنوَصّلها للمؤسسات وللأطفال بعد ما نلفها ونغلفها بشكل خاص ومميز. كل واحد حابب يشعر بمعنى مختلف للفرحة وللسلام الداخلي.. وِصِل.. وِصِل لَعِنّا... وِصِل لَ "شادي وأنا "وصل لَ "شوي مني وشوي منك بفرحوا كتار" وصدقوني , اللي بعطيبشعر بفرحة غامرة بمجرد يشوف بسمة الطفل وفرحة عيونه.